我哋點樣計「吉」同「凶」？
網站上每一個數字都係計出嚟嘅，唔係擇出嚟嘅。呢一頁講下點計。
一句講晒：我哋計三樣嘢
- 吉時 —— 幾時開機最平（當日有兩個高峰就俾兩個時段，否則一個）
- 凶時 —— 幾時最貴，避開佢
- 今明兩日 —— 今日同聽日各自整體係「大吉／吉／中／凶」邊一級
三樣都建基於同一堆數據：你所在地區過去 30 日嘅實際半小時電價。 唔同嘅只係點樣切。
基礎：三種顏色點分？
攞你所在地區過去 30 日嘅電價，由平排到貴，然後：
- 最平嗰 25% → 綠色「平」
- 中間 50% → 黃色「一般」
- 最貴嗰 25% → 紅色「貴」
- 低過 0p（即係用電有錢收）→ 藍色「負電價」
所以綠色嘅意思唔係「絕對好平」，而係「呢個價喺你區已經算係平嘅四分一」。 圖表上每一條柱嘅顏色，就係咁分。
點解唔用一個固定數字？
因為英國唔同地區嘅電價，差距大過好多人想像。以下係今次校準（2026-10-29）嘅實際數字：
| 地區 | 「平」係幾錢以下 | 「貴」係幾錢以上 |
|---|---|---|
| East Midlands（B） | ≤ 21p | > 33.6p |
| London（C） | ≤ 21p | > 33.6p |
| Yorkshire（M） | ≤ 21p | > 33.6p |
| Eastern England（A） | ≤ 22.2p | > 35.5p |
| West Midlands（E） | ≤ 22.2p | > 35.5p |
| North East England（F） | ≤ 22.2p | > 35.5p |
| North West England（G） | ≤ 22.2p | > 35.5p |
| Southern England（H） | ≤ 22.2p | > 35.5p |
| Southern Scotland（N） | ≤ 22.2p | > 35.5p |
| South East England（J） | ≤ 23.3p | > 37.3p |
| South Wales（K） | ≤ 23.3p | > 37.3p |
| North Wales & Mersey（D） | ≤ 23.4p | > 37.3p |
| South West England（L） | ≤ 24.3p | > 39.2p |
| Northern Scotland（P） | ≤ 25.6p | > 41p |
留意 East Midlands 同 Northern Scotland 嘅分別：喺Northern Scotland，25.6p 已經算「平」；但同一個價錢喺East Midlands就變成「一般」甚至貴。 如果全國用一個標準，住喺Northern Scotland嘅人就會發現成塊圖都係紅色，永遠等唔到「平」嘅時候。
「吉時」點揀出嚟？
電價每日下午四點公佈一批，去到聽日夜晚十一點。吉時就係喺呢一批價錢入面揀， 唔係按日曆日計。做法係：
- 先剔走所有「貴」嘅半小時，賸低嘅就自然斷開成幾段 —— 我哋叫佢做「低谷」
- 低谷入面如果仲有個位明顯凸起，都當佢係一個高峰，再斬多一刀
- 每段低谷入面，搵出你指定長度（預設 3 個鐘）嘅最平時段
- 最平嗰個蓋「首」印；如果另一段低谷有個時段同佢隔得夠開，就一併俾埋你，蓋「次」印
英國電價通常一日兩個高峰 —— 朝早同埋黃昏 —— 中間自然夾住兩段低谷：通宵嗰段， 同埋日頭嗰段。我哋係跟住當日嘅形狀切，唔係用鐘數硬切日夜。所以當日冇兩個高峰嘅時候， 就淨係俾一個時段你，唔會夾硬砌個「另一個選擇」出嚟。
「凶時」呢？
同一個時間範圍入面，所有連續一個鐘或以上、全部都係「貴」級嘅時段。 通常一日兩段：朝早返工嗰陣同埋黃昏四點到七點，兩段都會列出。
「今明兩日」評級 ——「大吉／吉／中／凶」點計？
呢個評級係評成日，唔係評上面推薦嗰段時間。呢點好緊要，容易搞亂。
今日同聽日各自一個評級，用同一把尺 —— 因為「今日抵唔抵做」呢個問題，答案永遠係同聽日 比出嚟嘅。聽日嘅電價通常要等到下晝四點左右先公佈，未出之前嗰行會寫明「明日之價未出」。
做法係：
- 攞當日全日最平嘅同樣長度時段（包括已經過咗嘅鐘數）
- 再攞過去 30 日，每日各自最平嘅同樣長度時段，得到 30 個數字
- 今日嗰個排喺最平嘅四分一 → 「吉」；中間 → 「中」； 排喺最貴嘅四分一 → 「凶」
- 如果平均價跌穿 0p → 「大吉」（用電有錢收，罕見但真係會發生）
點解要計埋已經過咗嘅鐘數？因為要同過去 30 日「成日」比，就要用「成日」嘅數字。 如果只計賸低嘅時間，落夜就會越比越差 —— 唔係因為市況差，而係因為平嘅時段已經過咗。
你拉個掣改時段長度，評級標準會跟住變 —— 因為搵 1 個鐘最平，一定平過搵 6 個鐘嘅平均。
幾時更新？
每日英國時間下午 4 點 15 分自動重新計一次 —— 即係 Octopus 公佈聽日電價之後，永遠用最近 30 日嘅數據。今次校準日期係2026-10-29。
數據嚟源同限制
- 所有電價直接嚟自 Octopus Energy 公開 API，係含 VAT 嘅單位電價（p/kWh）。
- 我哋唔計標準收費（standing charge），因為嗰個係每日固定收，幾時開洗衣機都唔會變。
- 用 30 日係一個取捨：太短會俾一兩日嘅極端價錢扭曲，太長就跟唔上季節變化（冬天同夏天嘅電價差好遠）。
- 呢個係相對比較，唔係預測。我哋話你知今日相對過去一個月係平定貴，但唔會預測聽日之後嘅價錢。
點解「今日剩低時間最平」冇評級？
當推薦時段落咗喺聽日，我哋仍然會另外俾返「今日剩低時間最平」嗰段你 —— 因為一籃衫好多時等唔到聽日。但嗰行冇評級，因為冇得公平咁比：所有評級都係同 「一整日最平嘅時段」比，而「剩低時間」只係當時仲未過去嘅幾個鐘，越夜就越比越蝕底， 無論市況幾好都會永遠顯示「凶」。
但嗰行會有個顏色標籤（「平」「一般」「貴」或者「負電價」），因為顏色問嘅 係另一條問題：呢個價錢，喺你區過去 30 日入面算平定貴？呢條問題對任何半個 鐘都問得公平。評級比日子，顏色比價錢 —— 唔同嘢嚟。