咩係 Octopus Agile?

Agile Octopus 係英國 Octopus Energy 一款「動態電價」計劃：電費唔係全日一個價，而係每半個鐘一個價，一日 48 個時段，跟住批發電力市場嘅價錢上落。

批發價平嘅時候（通常半夜、大風大太陽嘅日子），你嘅電價可以低到幾便士一度；需求高峰（通常黃昏 4 點到 7 點）就會貴好多。識得揀時間用電，先至係 Agile 慳錢嘅關鍵。

聽日嘅價錢幾點知？

每日英國時間下午 4 點左右,Octopus 會公佈聽日全日 48 個時段嘅價錢。即係話，你每晚都可以預先計劃：今晚定聽朝先開洗衣機？本站每日會自動更新，一眼睇晒今日同聽日邊段最平。

電價有冇上限？

有。Agile 嘅單位電價設有 100p/kWh 上限，就算批發市場癲咗，你都唔會畀多過呢個數。不過標準收費（standing charge）照計，同一般電價計劃一樣。

負電價係咩嚟？

有時風電、太陽能發電多到用唔晒，批發價會跌穿零 — 呢個時候 Agile 用戶用電仲有錢收（叫做 plunge pricing）。雖然唔係日日有，但一年總會遇到幾次，通常喺大風嘅深夜。見到本站個圖出現藍色柱，就係負電價時段喇。

邊啲人啱用 Agile?

• 可以彈性揀時間用電嘅家庭（洗衫、洗碗、乾衣可以較 timer）
• 有電動車、儲能電池，或者用電熱水爐嘅屋企
• 日頭返工、夜晚先喺屋企用電嘅人 — 避開黃昏高峰就得

相反，如果你多數喺黃昏 4–7 點大量用電而又冇得改，Agile 可能反而貴過固定價計劃，轉會前要諗清楚。